به‌رپرسێكی بانكی ناوه‌ندی زانیاری ورد له‌باره‌ی چاره‌نوسی دۆلار به‌رامبه‌ر به‌دیناری عێراقی ئاشكراده

بانكی ناوه‌ندی عێراق ئه‌و پێشبینیانه‌ی ڕه‌تكرده‌وه‌ كه‌ باس له‌وه‌ده‌كه‌ن به‌های 100 دۆلار بۆ 170 هه‌زار دینار به‌رزببێته‌وه‌ و راشیگه‌یاند، هاوڵاتیان مافی خۆیانه‌ كه‌ له‌هه‌ركاتێكدا بیانه‌وێت پاره‌كانیان به‌دۆلاری كاش له‌ بانكه‌كان وه‌ربگرنه‌وه‌.

مازن سه‌باح ئه‌حمه‌د، به‌ڕێوه‌به‌ری گشتیی فه‌رمانگه‌ی وه‌به‌رهێنان و گواستنه‌وه‌ی ده‌ره‌كی له‌ بانكی ناوه‌ندی رایگه‌یاندوه‌، “ئه‌و زانیاریانه‌ی له‌ ئاژانسی ڕۆیته‌رز بڵاوكراونه‌ته‌وه‌، به‌ شێوه‌یه‌كی نادروست خراونه‌ته‌ڕو سه‌باره‌ت به‌ به‌های دۆلار به‌رامبه‌ر به‌دیناری عێراقی”.

بانكی ناوه‌ندی گره‌نتی دانانی دۆلار ده‌كات

مازن سه‌باح ئه‌حمه‌د ئه‌وه‌شیخسته‌ڕو، بانكی ناوه‌ندی گره‌نتی دانانی دۆلار ده‌كات، ئه‌و هاوڵاتییه‌ی پێشتر یان تا ساڵی 2024 پاره‌كانیان به‌ دۆلار له‌ هه‌ر بانكێكی عێراقی دانابێت، مافی سروشتی خۆیانه‌ هه‌یه‌ ئه‌و بڕه‌ پارانه‌ به‌ شێوه‌ی كاش و به‌ دۆلاری ئه‌مریكی وه‌ربگرنه‌وه‌.

له‌ چاوپێكه‌وتنه‌ ڕۆژنامه‌وانییه‌كه‌دا هیچ ئاماژه‌یه‌ك به‌و پێشبینیانه‌ نه‌كراوه‌ كه‌ به‌های دۆلار به‌رزببێته‌وه‌

ئاماژه‌ی به‌وه‌شكرد، “له‌ چاوپێكه‌وتنه‌ ڕۆژنامه‌وانییه‌كه‌دا هیچ ئاماژه‌یه‌ك به‌و پێشبینیانه‌ نه‌كراوه‌ كه‌ به‌های دۆلار به‌رزببێته‌وه‌ و به‌های 100 دۆلار 170 هه‌زار دینار، هه‌روه‌ها بانكی ناوه‌ندیش هه‌نگاوی خۆی هه‌یه‌ كه‌ بۆ كه‌مكردنه‌وه‌ی جیاوازی نێوان نرخی دۆلار به‌ فه‌رمی و له‌ بازاڕه‌كان به‌كاریده‌هێنێت، ڕێوشوێن هه‌یه‌ كه‌ ده‌گیرێته‌به‌ر كه‌ به‌شدار ده‌بێت له‌ كه‌مكردنه‌وه‌ی جیاوازی نێوان ئه‌و دو نرخه‌”.

ئه‌و چاكسازیانه‌ی كه‌ له‌لایه‌ن بانكی ناوه‌ندی عێراقه‌وه‌ ئه‌نجام دراون ئامانجیان به‌دیهێنانی پابه‌ندبونی بانكه‌كه‌یه‌

ئه‌وه‌شیخسته‌ڕو، ئه‌و چاكسازیانه‌ی كه‌ له‌لایه‌ن بانكی ناوه‌ندی عێراقه‌وه‌ ئه‌نجام دراون ئامانجیان به‌دیهێنانی پابه‌ندبونی بانكه‌كه‌ و سیستمی بانكی به‌گشتیه‌ به‌ ستاندارده‌ نێوده‌وڵه‌تییه‌كان، به‌ شێوه‌یه‌ك كه‌ ڕێگری بكات له‌وه‌ی دۆلار بگاته‌ ئه‌و لایه‌نانه‌ی كه‌ قه‌ده‌غه‌كراون به‌ده‌ستیبهێنن یان یاری به‌نرخ ده‌كه‌ن.

راگرتنی ده‌رهێنانی دۆلار به‌ هیچ شێوه‌یه‌ك دۆلاری هاوڵاتیان له‌ ئه‌مریكا ناگرێته‌وه‌

ئه‌و به‌رپرسه‌ی بانكی ناوه‌ندی ئاشكراشیكردوه‌، “ڕاگه‌یاندنی ئه‌وه‌ی كه‌ رۆژی 1ی (كانونی دوه‌م/1)ی 2024ه‌وه‌ ده‌بێته‌ سه‌ره‌تای وه‌ستاندنی ده‌رهێنانی پاره‌ی نه‌ختینه‌، ئه‌و گواستنه‌وانه‌ ده‌گرێته‌وه‌ كه‌ ته‌نها له‌ ده‌ره‌وه‌ی عێراقه‌وه‌ وه‌رگیراون، به‌پێی هه‌ندێك ڕێكخستن كه‌ گه‌ره‌نتی به‌رده‌وامیی بازرگانی ده‌كات، به‌ هیچ شێوه‌یه‌ك دۆلاری هاوڵاتیان له‌ ئه‌مریكا ناگرێته‌وه‌”.

پێشتریش ئاژانسی رۆیته‌رز له‌سه‌ر زاری مازن سه‌باح ئه‌حمه‌د به‌ڕێوه‌به‌ری گشتی به‌شی وه‌به‌رهێنان و گواستنه‌وه‌ له‌ بانكی ناوه‌ندی بڵاویكرده‌وه‌، بۆ راگرتنی به‌كارهێنانی نایاسایی دۆلار له‌ ساڵی داهاتوه‌وه‌ راكێشان و مامه‌ڵه‌كردن به‌ دۆلاری كاشه‌وه‌ قه‌ده‌غه‌ ده‌كه‌ن.

ئه‌وه‌شخرابوه‌ڕو، ئه‌و كه‌سانه‌ی پێش كۆتایی ئه‌مساڵ دۆلار له‌ بانكه‌كان داده‌نێن، ده‌توانن له‌ ساڵی 2024دا پاره‌ به‌ دۆلار رابكێشنه‌وه‌، به‌ڵام ئه‌و دۆلارانه‌ی له‌ ساڵی 2024 ده‌خرینه‌ بانكه‌وه‌ ته‌نها به‌ دراوی عێراقی به‌ نرخی فه‌رمی كه‌ 132 هه‌زار دیناره‌ به‌رامبه‌ر هه‌ر 100 دۆلارێك وه‌رده‌گیرێنه‌وه‌.